أنـا ولا هِيَّا
لما بتعدى قصادنا
بتهدى ،،
شغلت قلبى وقلبها
يا ريت تقولى وتقولها
مين فينا مين
بتحبها!!
ومين فينا قلبك
بيروح لها!!
أنا ولا هيَّا
مين فينا أكتر
ومين شويه!!
مين فينا بتحلم
دايما بها
نظرة عينك ليه بتقسمها
كل ما تعدى
بينى وبينها
نص ليا ونص لها!!
حيرتنا .. غلبتنا
عودتنا على سكتك
خليتنى احبك
و هى كمان عشقتك
سألتنى سؤال .جاوبت ف الحال
ونفس السؤال سألتها
بتحبيه ؟ روحك فيه ؟
قالت : لا , بس لا
مش من قلبها
أما انا قلت لها بحبه اه
ودايبه فى هواه
باعشق عينيه وسحرها
بصيت فى عنيها
و بصت فى عنيا
صعبت عليها وصعبت عليا
وقلت لها
إنتى كمان بتحبيه؟
بقالك زمان وروحك فيه
قالت : ايوه وباحلم بيه
باعشق عينيه وسحرها
سِكتنا شويه سكتنا ليه؟
حاولنا نفكر نعمل ايه!!
حبنا ، حلمنا بقى مشكله
انت السبب من غير سبب
وانت اللى تقدر تحلـها
بنظره واحده فى ناحيه واحده
تقدر تقول بمين مشغول
أنا ولا هيا مين فينا
اكتر ومين شويه
ومين بتحلم
بقربهـــا
ومين فينا مات حلمها
لو أنا ها افرح
لو هيا ها افرح
ايوه ها افرح
ومفرحش ليه
حبك لها
مش ذنبها
عينيك السبب
معرفش ازاى صدقتها
لــــــــ الشاعر / رضا عبدالعزيز محمد
002-01006395604
https://www.facebook.com/poet.reda.abdelaziz.mohmed